Tuesday, December 27, 2011

အလွမ်း ၊ မျှော်လင့်ချက်မြူခိုး ၊အိပ်မက်

    ကျွန်တော်ရုန်းမထွက်ချင်ပါ၊၊ရုန်းထွက်ရန်လည်းဘယ်သောအခါကမှအားမထုတ်ခဲ့ပါ၊၊ခိုင်မြဲစွာရစ်ချည်ထားလေ
သောသံယောဇဉ်ချည်တိုင်တွင် မွေ့ပျော်သည်၊၊အထပ်ထပ်ဝန်းရံဆီးကာထားသောညွှတ်သွယ်ပျော့ပျောင်းသည့်
သံယောဇဉ်လက်ချောင်းများကြားတွင်ယစ်မူးသည်၊၊ကျွန်တော့်အတွက်အချစ်သည်အိပ်မက်ပမာသာဖြစ်သော် 
လည်း ထိုအိပ်မက်ကိုအဆုံးထိမက်ချင်ပါသေးသည်၊၊သံယောဇဉ်နှင့်ရစ်ပတ်ဖွဲ့နှောင်ကာစတင်ခဲ့သောချစ်ခြင်း
များစွာ  တို့သည်ကျွန်တော်ရင်ဘတ်တစ်ခုလုံးအတွက်တော့ရွှမ်းစိုမြနေပါလိမ့်မည်၊၊သူသည်နှလုံးသား အခိုး    အမျှင်ဖြစ်သည် ၊၊သူသည် ကျွန်တော့်ကဗျာဖြစ်သည်၊၊သူသည်အိပ်မက်အပိုင်းအစဖြစ်သည်၊၊ သူသည်ကျွန်တော့်နှလုံးသား၏နှလုံးသားတစ်ခုပင်ဖြစ်တော့သည်၊၊သူသည်.၊သူသည်..ကျွန်တော့်ရင်ခွင်ကမ္ဘာ

၏ မြေထု၊လေထု၊ရေထု မရှိမဖြစ်အလုံးစုံ ပင် ဖြစ်တော့သည် ၊၊      
               အလွမ်းတို့သည် ချိုမြိန်မွှေးမြပါသည်ဟုဆိုရသော် လူတိုင်းငြင်းကြပေလိမ့်မည် ၊၊စင်စစ်ဆိုရသော် အလွမ်းသည်အဆိပ်ရည်တို့လိမ်းသုတ်ထားသော သစ်သီးပုပ်တစ်လုံးလိုသာဖြစ်သည် ၊၊သို့သော် ကျွန်တော့်
အတွက်မူချိုမြလတ်ဆတ်သောပန်းဝတ်ရည်သာဖြစ်ပါသည်၊၊သူ့ထံမှသူနှင့်ပတ်သတ်သမျှတို့သည်ကျွန်တော့်  
အတွက်ထာဝရပျံ့သင်းထုံမွှေးနေပါလိမ့်မည် ၊၊သူ့အချစ်ကို ခပ်မှိန်မှိန် သာ တမ်းတမိသည် ၊၊ သူ့နာမည်ကို ခပ်ဖွဖွတီးတိုးရေရွတ်ရင်း ခပ်ပြင်းပြင်းလွမ်းနေမိသူမှာ ကျွန်တော်ပင်ဖြစ်သည်၊၊တမ်းတမြူတို့သည် ဝေ့ဝေ့ ကလေးသိုင်းဖွဲ့ရစ်လာလေတိုင်း နှလုံးသွေးကြောထဲက တောင်းတမိသူမှာ သူသာဖြစ်သည် ၊၊
                      အချစ်စိတ်ကူးစန္ဒကူးတောထဲတွင် ကျွန်တော်သည်သူနှင့်အမြဲတမ်းမျောလွင့်နေတတ်သည်၊၊ အိပ်မက်ပြာပြာတွေ ထဲတွင် သူ့ပုခုံးနွဲ့နွဲ့ထက်ဝယ် မှီတွဲခိုနေသူမှာမှာလည်းကျွန်တော်ပင်ဖြစ်သည်၊၊၀ုန်းဒိုင်း ကြဲပွင့်ဖူးလာသော ရင်ခုန်ခြင်းပန်းတို့သည် လည်း သူ့အတွက်သာဖြစ်သည် ၊၊အသက်ရှူတိုင်း ၊ နှလုံးတစ်ချက်ခုန်လှပ်လေတိုင်း တမ်းတရည်မျှော်ကာ အလွမ်းတို့ကို ခန္ဓာကိုယ်အနှ သွေးကြောထဲ ရှူသွင်းမိမြဲသာ ၊၊“ဟိုး...ဘက်ဘ၀တွေတည်းက ချစ်ခဲ့သူရယ်ပါ ၊ နောင်ဘ၀အဆက်ဆက်ချစ်မယ့်သူရယ်ပါ ” ဟုတိုင်တည်စကားပြောကြားလိုမိသော်လည်းကျွန်တော့်ကိုတစ်စုံတစ်ရာမကသောအကြောင်းအရာတို့ကဆွံ့
အပိတ်ဆို့စေ၏ ၊၊   ရင်ထဲက ဘယ်တော့မှ လွင့်ကြွေသွားမည်မဟုတ်သော မျှော်လင့်ချက်လတစ်စင်းမှာ
 သူပင်ဖြစ်သော်လည်း ကျွန်တော့်အဖို့မူကား ညှို့မှိုင်းဆွေးဝေသော မျက်ဝန်းတို့ဖြင့်ငေးကြည့်ရုံသာ ၊၊

               အိပ်မက်ရော်ရွက်ဝါတို့သည် ညမြေပြင်ထက်ဝယ် တရှဲရှဲအော်မြည်ကာ ကြွေလျောကြကုန်၏၊၊ တမ်းတလှိုက်ဖိုရသောရင်ဘတ်သည် စိတ်ပင်လယ်ထဲဝယ် မြုပ်ချည် ၊ပေါ်ချည် ၊၊  သူ့ ကိုသာ ၊ သူ့ကိုသာ ၊
 အိုကွယ်သူ့ကိုသာစွဲညွှတ်တမ်းတမိသူ၊၊သူ့လက်ချောင်းပုပုဖောင်းဖောင်းလေးတွေသူ့လက်ခုံပေါ်မှ မွေးညှင်း   နုနုစိမ်းစိမ်းလေးများ ၊ ဆေးမဆိုးသော ဖြူရော်ရော်နှုတ်ခမ်းလွှာပါးလေးများသည် ကျွန်တော့်အိပ်မက်၏

အရှင်သခင်များဖြစ်ကြသည် ၊၊ကျွန်တော်သည် ရှိုးကေ့ထဲတွင်ပြထားသောအရုပ်လှလှတစ်ရုပ်ကို ၀ယ်ယူရန်
မတတ်နိုင်သည့်ကလေးငယ်တစ်ယောက်လိုသာဖြစ်သည်၊၊အချစ်သည်ဘ၀၏အရေးကြီးဆုံးသော အလွှာတစ်ခု မဟုတ်ပေ ၊၊သို့သော် သူသည်ကား နှလုံးသား၏အခမ်းနားဆုံးသောအလွှာတစ်ခုသာတည်း။။

   ဘ၀ကို ဆွေးရီမှုန်ဝေမှုတွေနဲ့လှပစွာထုဆစ်နေသူ ၊အချစ်တို့သည်တရွေ့ရွေ့လက်ပြနှုတ်ဆက်သွားလေပြီ ၊၊ အသည်းနှလုံးချွေရထား၏စူးစူးဝါးဝါးဥသြဆွဲသံအောက်ဝယ် အရာရာမှုန်ဝါးပျောက်ရှကုန်၏ ၊၊တမ်းတသည် ၊၊မြတ်နိုးသည် ၊၊စွဲလမ်းသည် ၊၊ချစ်သည် ၊၊ချစ်ခဲ့သည် ၊၊ချစ်နေဆဲဖြစ်သည် ၊၊အို..ကွယ် ဘယ်လိုပင်မေ့မေ့မေ့မရလေသော အလွမ်းတောဝယ် တ၀ဲလည်လည် ၊၊မထားရစ်ပဲ နေရစ်ခဲ့သူ ၊ မချန်ရစ်ပဲ ကျန်ရစ်ခဲ့ရသူ၊၊ထိုသူသည်ကားကျွန်တော်ပင်တည်း၊၊အလွမ်းလေညင်းတို့သည်ပုတ်ခါခတ်ခါနှလုံးသား သစ်ပင် ကို  တခါတရံခပ်နှော့နှော့လေး တိုက်ခတ်သွားတတ်မြဲ ၊၊
                                 လဲ့ပြာကွဲအက်သွားသော ရင်ခွင်ကောင်းကင်ထက်တွင် အလွမ်းကြယ်လေးများသည် ဟိုတစ်ပွင့် ၊ ဒီတစ်ပွင့် တဖိတ်ဖိတ်တောက်လျက် ၊၊အချစ်နွံ့အိုင်သည် အဆင်းလွယ်၍အတက်ခက်ကြောင်း
 ကျွန်တော်ရှာဖွေတွေ့ရလေပြီ ၊၊နေရစ်ခဲ့တော့မည်၊၊ကျွန်တော် သည်သူနှင့် အဝေးဆုံး...၊ အဝေးဆုံး.........၊၊


                         အလွမ်းတို့သည် နှလုံးသားကမ်းပါးကိုတမြေ့မြေ့တိုက်စားဖဲ့ချွေသွား၏၊၊ဘ၀၏တစ်စိတ် တစ်ဒေသတို့သည်လည်းအလွမ်းအိပ်မက်တွေထဲတွင်သာ နစ်မြုပ်ပျော်ဝင်ကုန်၏ ၊၊နေ့နေ့ ၊ညည
တို့သည် ကြမ်းရှခါးသက်လာ၏ ၊၊သံယောဇဉ်ကိုင်းဖျားထက်ကမျှော်လင့်ချက်အငုံအပွင့်တို့သည် လွင့်ကြွေ
ကုန်ကြ၏ ၊၊ဝေးကွာခြင်းနှင့်ဆုံးရှုံးခြင်းတို့ကြားတွင် နှလုံးသားဦးညွှတ်ခွေကြလေပြီ ၊၊ခြေလှမ်းနွဲ့နွဲ့ ၊
 ရယ်သံပါးပါး ၊ နွဲ့လျဖျော့ဖျော့ သူ့၏အရိပ်များသည် အတိတ်မှ ယခုတိုင်ထိသတိရနေဆဲ ၊၊ အလွမ်းထဲတွင် အချစ်မရှိဟုဘယ်သူငြင်းမည်နည်း၊၊အကယ်၍ငြင်းလာသူရှိပါကကျွန်တော်ပြန်လည်ငြင်းပါဦးမည်၊၊
အလွမ်းထဲတွင်အချစ်သာမကသံယောဇဉ်အစိတ်အပိုင်းတချို့ပင်ရှိနေပါသေးသည် ၊၊

             အလွမ်းတွေကိုခြုံ၍အိပ်စက်နေသူကျွန်တော့်အဖို့ကားညတို့သည်တမ်းတမြူတို့ဖြင့်  ဖြူရော်ရော်၊၊  ရင်ခွင်ကောင်းကင်ထက်တွင် မျှော်လင့်ချက်တိမ်လွှာတို့သည် မျောလွင့်ရင်းဖြင့် သူ့အရိပ်ထဲ
လူးလာပျံဝဲ နားခိုမိဆဲသာ ၊၊
                                                                                                               မောင်ရေချမ်း
                                                                           ( Hello အနုပညာဂျာနယ်၊Vol.3/Issu28/February/2012)

No comments:

Post a Comment

နှစ်သက်စွာ ခံစားနိုင်ပါစေ