Wednesday, April 4, 2012

ကြယ်စင်ဖြူအတွက် အဖြူသက်သက်ကဗျာ

                          ကိုယ်တို့ရပ်နေတဲ့ မြေကြီးဟာ ညစ်ပေညိုပုပ်နေလား
                            .....................        ....      ၀င်းဝါစိုလဲ့နေလား
                            သေချာငုံ့ကြည့်ပါဦး .....       ကြယ်စင်ဖြူ
                            အမှန်တရားဆိုတာ
                            ဘယ်တော့မှ ခါးသွားမှာမဟုတ်တဲ့သစ်သီးတစ်လုံးဖြစ်ရဲ့   ၊ ကြယ်စင်ဖြူ  ၊၊


                            သမိုင်းဝင်ဝင်  ၊ မ၀င်ဝင်
                            ရဲရင့်တတ်သူတွေဟာ သူရဲကောင်းလို့အမည်တွင်မယ်
                            ကြယ်စင်ဖြူရယ်  ....
                            သေသူတွေသာ ကိုယ်တို့ကို အိပ်မက်ပေးခဲ့ရင်

                            သူတို့လိုချင်ခဲ့တဲ့ ကမ္ဘာအကြောင်းပဲဖြစ်မှာ အသေအချာ
                            ငြိမ်းချမ်းလို့      ၊ သာယာစည်ပင်လို့   ၊ ၀ါဝင်းလလဲ့စိုလို့
                            ရွှေအိုရောင်ဝင်းတဲ့ ဥယျာဉ်တော်အတွင်း
                            သူတို့ ၀ိညာဉ်တွေ သက်ဆင်းပျော်မွေ့နေရော့မယ်   ၊၊

                            ကြယ်စင်ဖြူရယ်
                            စိတ်ကို အဖြူသက်သက်သာ ထားကြည့်ပါကွယ်
                            မင်းမျက်ဝန်းတွေဟာ အတိတ်ထဲမှာ ဝေ့သီညှို့ဆိုင်းလို့
                            ဒေါသငွေ့တွေ ထောင်းထောင်းထ
                            ကိုယ့်ဆီ ကူးစက်ဖြာကျလာတာ မကျေနပ်မှုအငွေ့တွေ
                            မင်းဟာ မယုံကြည်စရာအကြောင်းကိုပဲ ထပ်ခါထပ်ခါပြောဆို
                            ခေါင်းကို သွင်သွင်ခါယမ်းပြီး တောက်အချက်ပေါင်းများစွာခေါက်
                            တောက်ခေါက်နေရုံနဲ့ မပြေတဲ့ဒေါသတွေ
                            သက်ပြင်းဖွဖွ ချလို့သာ ဖြေသိမ့်ပါတော့ကွယ်   ၊၊

                            ကြယ်စင်ဖြူရေ....
                            လှည့်ဖျားတတ်တဲ့မှော်ကဝေလို ကြောက်မက်ဖွယ်လူတွေကို
                            မင်းမုန်းသလို ငါလည်းမုန်းတာပဲကွယ်
                            ဘာမှ ထူးထူးထွေထွေမရှိတဲ့ သူတို့အကြောင်းတွေမှာ
                            စက်ဆုပ်မှုတွေ ၊ ရွံ့ရှာမှုတွေကတော့ ထူထူထဲထဲ
                            ဝေါ့ခနဲ ထိုးအန်လာလိမ့်မှာ အသေအချာ
                            တကယ်တော့ သူတို့ဟာ သံချေးအထပ်ထပ်နဲ့
                            ဘယ်တော့မှ ရေမချိုးတတ်တဲ့သတ္တ၀ါတွေလည်း ဖြစ်ရဲ့
                            သူတို့ဟာ သူတို့အသက်ရှူသံမှန်မမှန်
                            ဘယ်တော့မှ စမ်းစစ်မှာမဟုတ်တဲ့သူတွေလည်း ဖြစ်ရဲ့
                            သူတို့ဟာ သူများအရိုးတွေကို ရိုင်းစိုင်းစွာချိုးလို့
                            သူတို့သမိုင်းကို ထွင်းထုထားသူတွေလည်း ဖြစ်ရဲ့
                            ကြယ်စင်ဖြူရေ.................
                            သူတို့ကို အိပ်မက်ခိုးဘီလူးတွေအဖြစ်   ငါ တို့ ရင် မှာ ထွင်း စိုက်
                            ဘယ်တော့မှ မမေ့လိုက်ပါနဲ့
                            သူတို့အကြောင်းဟာ သူများရေးတဲ့ဒိုင်ယာရီအဖြစ်ရှိနေမှာ
                            တစ်ချိန်ချိန်မှာ ပြန်ပြောဖြစ်မယ်ဆိုရင်
                            အံကြိတ်သံ ၊ ဖန်ခွက်ခွဲသံ ၊ တောက်ခေါက်သံတွေနဲ့ ညံစီနေဦးမယ်ကွယ်  ၊၊

                           " မျှော်လင့်ချက်တွေ ရေထဲပစ်ချကြည့်တော့
                              ပလုံ လို့ မလှမပ မြည်သွားတယ် " တဲ့
                              မင်းပြောဖူးတဲ့စကား ကိုယ့်နားထဲမှာ စွဲနေတယ်
                              အားတင်းထားစမ်းပါ     ....ကြယ်စင်ဖြူ
                              အခု...အချိန်ပေါင်းများစွာ အိပ်ဆေးခပ်ခံရတဲ့ အိပ်မက်တွေ
                              လွန့်လူးနိုးထလို့ ညင်သာစွာ ရုန်းကြွလာပြီလေ
                              မျှော်လင့်ချက် အလင်းမျှင်ဟာ သဲ့သဲ့လေးတော့ ထွန်းပလာပေါ့
                              အားတင်းထားစမ်းပါ...
                              အားတင်းထားစမ်းပါ......     ကြယ်စင်ဖြူ
                              ဘ၀ဆိုတာ မျှော်လင့်ချက်နဲ့မှ စိမ်းစိုအသက်ဝင်တာကွဲ့   ၊၊

                              ကြယ်စင်ဖြူရေ...
                              ကောင်းကင်ကိုမြင်ပြီး လအစင်းလိုက်မမြင်သူတွေလိုတော့
                              မင်းမျက်လုံးတွေ မကန်းစေနဲ့ကွယ်
                              အဖြူကို အမည်းလုပ်ချင်တွေကိုလည်း ရဲရင့်စွာတွန်းလှန်တတ်ပါစေ
                              အိပ်မက်ဆိုတာ ဘယ်တော့မှ မသေတဲ့အမျိုးမို့
                              ကိုယ်ယုံကြည်ရာကိုယ် ရိုးရိုးရဲရဲဆက်မက်နေတော့ကွယ်
                              အသက်ရှူဖို့ တစ်ခုတည်းသက်သက်နဲ့တော့
                              လူဟာ လူပီပီ ဘယ်တော့မှ မမည်ဘူးကွယ်
                              လူမှန်ရင် လူစော်နံဖို့ လူလိုကျင့်ရမယ်
                              ရောက်ရာနေရာမှာ တာဝန်ကျေ
                              အဲဒါမှ လူမည်ပေလိမ့်မယ် ...ကြယ်စင်ဖြူ
                              လူ့အခွင့်အရေးဆိုတာ
                              အသံစာစာနဲ့ ရွတ်နေရမယ့်ကဗျာမို့
                              အကြောက်ငွေ့ကိုလည်း အဆုတ်နဲ့ဝေးရာ ရှူထုတ်တတ်ပါစေ ...ကြယ်စင်ဖြူရေ   ၊၊

                              လွန်လေပြီးသောမည်းညစ်မှုဆိုတာ
                              ဘယ်ဆပ်ပြာနဲ့ဖွပ်ဖွပ် ဖြူလာမှမှမဟုတ်တာ ..ကြယ်စင်ဖြူရယ်
                              မည်းညစ်သူတွေ ကျဆုံးတဲ့နေ့
                              ကမ္ဘာမြေဟာ တုန်ခါလို့ ကောင်းချီးပေးဦးမှာ အသေအချာပါ
                              ကဲ......ကြယ်စင်ဖြူရေ
                              အမှန်တရားဟာ တစ်ချိန်မှာတော့ ခေါင်းမော့ရင်ကော့လို့
                              လှပညင်သာစွာ ၀င့်ကြွားလာမယ်ဆိုတာ ယုံနေပါတော့         ။               ။
                  
                                                                                                            မောင်ရေချမ်း

2 comments:

  1. ဟုတ်ပါရဲ့ ကြယ်စင်ဖြူ..
    မင်းမသိခဲ့တဲ့လမ်းမှာ လျှောက်လှမ်းကြည့်စမ်းပ.. ကွယ်
    ငယ်ဘ၀ အဖြူထည်လေးတွေ ဆင်လို့
    လူငယ်ဟာ လူငယ်လိုတွေး
    လူငယ်လိုပြေးနေသမျှ
    အလှတွေ ပင်လယ်ဝေ..
    ငါတို့နေတဲ့ကမ္ဘာမြေလည်း ငြိမ်းအေးစေဖို့အကြောင်းပဲပေါ့
    ကြယ်စင်ဖြူရေ..
    တစ်ခုပဲ
    စိတ်အတွေးကို အရောင်မဲ့ကြည့်လိုက်ဖို့.. ပါ ။

    ReplyDelete
  2. အမှန်တရားဆိုတာ
    ဘယ်တော့မှ ခါးသွားမှာမဟုတ်တဲ့သစ်သီးတစ်လုံးဖြစ်ရဲ့ ဆိုတာက စလို့

    အမှန်တရားဟာ တစ်ချိန်မှာတော့ ခေါင်းမော့ရင်ကော့လို့
    လှပညင်သာစွာ ၀င့်ကြွားလာမယ်ဆိုတာ ယုံနေပါတော့ ဆိုတာထိ ကျွန်မ နှစ်သက်စွာ ဖတ်သွားမိတယ်။

    လေးစားစွာဖြင့်
    မြတ်

    ReplyDelete

နှစ်သက်စွာ ခံစားနိုင်ပါစေ