Tuesday, August 21, 2012

ပန်းမပွင့်ဘူး/နေလည်းမသာဘူး/ကောက်လို့မရတဲ့အတိတ်စိမ်းတွေပဲ လာလာပေးနေ

ဒါ ခေတ်နာကံနာပဲ။ရက်ရက်စက်စက်အသေအပျောက်များတဲ့နာရီတွေထဲမှာ အမှောင်ကိုဖက်ပြီးအိပ်နေကြရတာ
ဒါ ခေတ်နာကံနာပဲ။ထပ်ခါထပ်ခါ ပုံပြင်ဟောင်းတွေထဲမှာ ငါတို့ငိုယိုနေရတာ
ဒါ ခေတ်နာကံနာပဲ။တခြားလူတွေက ငါတို့လူတွေကို ဈေးဆစ်ပြီးဝယ်သွားကြတာ
ဒါ ခေတ်နာကံနာပဲ။ အစွယ်အသွားတွေနဲ့ လှောင်ပြောင်ရယ်မောပြတာ ခံနေရတာ
မျက်မျက်အထူကြီးတပ်ပြီး လမ်းပျောက်လို့ ၊ ခြင်္သေနဲ့လည်းတွေ့ ကျားနဲ့လည်းတွေ့ ဘယ်သူနဲ့ဘယ်လိုလိုတွေ့တွေ့
သမင်နဲ့တွေ့ရင်တောင် ငါတို့ဟာ အစားခံရမဲ့မြက်ပင်လေးဖြစ်သွားမှာ
ဒါ ခေတ်နာကံနာပဲ။ ပုံပြောကောင်းတဲ့ကဝေတွေနဲ့ရေစက်ဆုံနေရတာ ( @ # ! # & )
လွမ်းကောင်းလောက်လောက်အောင် ငါတို့ဟာ ရာဇ၀င်အိုထဲမှာ ရွှေထီးဆောင်းခဲ့ဖူး။ ဒါ ခေတ်နာကံနာပဲ။
ဘုရား၊ရဟန်း၊ကျောင်း၊ဒါယိကာမကြီး ဒေါ်ခင်ချစ် ( ၆၂ ) နှစ်။
ရခိုင်ပြည်နယ် ဒေသံပြည်သူများအတွက်အလှူငွေနှင့်စားသောက်ကုန်များ လှူဒါန်း
နိုင်ငံနှင့်နိုင်ငံသားတုိ့အကျိုးကို ဥပေဒနှင့်အညီ အကာအကွယ်ပေးနိုင်
မြ၀တီရုပ်မြင်သံကြား အစီအစဉ်အကျဉ်း။ ဓမ္မဓိဠာန်ကျကျ ရှုမြင် ( ကြေးမုံစာတည်း ရှုထောင့် )
ပိုင်ဆိုင်ခွင့်အငြင်းပွားကျွန်းစု တောင်ကိုးရီးယားသမ္မတသွားရောက်မှု ဂျပန်ကန့်ကွက် (နိုင်ငံတကာသတင်း )
ကြေးမုံ The Mirror ၁၃၇၄ ခုနစ်၊ ဒုတိယ၀ါဆိုလပြည့်ကျော် ၉ရက်နေ့ ၊စနေနေ့ ( 11.8.2012 )
အစရှိသဖြင့် ဘာညာဘာညာ။ ထိုကြောင့် ဤသည်တို့သည် တို့ဖြစ်ပါသောကြောင့် ထို့ပြင် ၄င်းမှာအထက်ပါအချက်များအရ
ကျွန်ုပ်တို့သည် ဘာဖြစ်ကြပါသည်။ ညာဖြစ်ကြပါသည်။ ထို့ကြောင့် ညာဖြစ်ကြပါသည်။
ဘယ်လိုပဲပြောပြော စကားတွေမပီတော့ဘူး။အဲဒါလည်းခေတ်နာကံနာ။ လွမ်းစရာရှိရင်နာစရာနဲ့ဖြေ။(နာစရာကိုမှ ထပ်လွမ်းကြ)
ဘယ်လိုမှ ပြန်မလာတော့တဲ့နွေများ၊ဆောင်းများကို တိုးတိုးတိတ်တိတ်သတိရကြ
ဒါ ခေတ်နာကံနာပဲ။ ဘယ်သူရဲကောင်းမှ ဓားထမ်း၊လှံထမ်းလို့ ပြန်မလာနိုင်တော့ဘူး။
ငါတို့တစ်အိမ်လုံး ရွှဲရွှဲစိုလို့ ။ (ခေါင်ကနေ အိမ်သာအမိုးထိအပေါက်အဖြဲများစွာနဲ့ )
ဒါ ခေတ်နာကံနာ ။ ခေတ်နာကံနာတဲ့ ။

                                                                                                         မောင်ရေချမ်း
                                                                                (စာပွင့်လွှာမဂ္ဂဇင်း ၊ နိုဝင်ဘာလ ၊ 2012 )

No comments:

Post a Comment

နှစ်သက်စွာ ခံစားနိုင်ပါစေ