Tuesday, June 16, 2015

ရန်ကုန်မြို့က လူငယ်တစ်ယောက်

အုတ်ကြားမြက်ပေါက်တစ်ကောင်လို
လူငယ်တစ်ယောက်။
လမ်းပေါ် ပြေးထွက်လာခဲ့တယ်
ကဗျာတွေ အန်ချတယ်
ရသမျှဟာ မတန်ဘူး ထင်တယ်
လူငယ်တစ်ယောက်။

ရန်သူကို ရန်လိုတဲ့အကြည့်နဲ့ လူငယ်တစ်ယောက်
ငါးပါးမှောက်နေတဲ့မြို့ကြီးရဲ့မြောင်းနှုတ်ခမ်းပေါ်မှာ
ဒါ အပျော်ကန်နေတဲ့ ဘောလုံးပွဲမဟုတ်ဘူး
မမိုက်ဘူးထင်ရင် မူးမေ့သွားတဲ့အထိဆဲမှာပဲ
မုန်းနေတဲ့ဟာကို ချစ်အောင်လာလာသွေးထိုးနေတယ်
တကယ် စက်ဆုပ်ရွံရှာစရာပဲ

ပါရီကို ငေးကြည့်ခဲ့တဲ့ အီလျာအာရင်ဘတ်လို
အဲဒီလိုပြောရင် ကြီးကျယ်တာ မတန်မရာမှန်း သူသိတယ်
ဒါပေမဲ့ ဘာဖြစ်သလဲ
သူ့ဝါကျမှာ သူတင်စားချင်သလို တင်စားမယ်
ထပ်ပြောတယ်
ပါရီကို ငေးကြည့်ခဲ့တဲ့ အီလျာအာရင်ဘတ်လို
သူလည်း ရန်ကုန်ကို အသံစုံအောင်ငေးကြည့်ခဲ့တာပဲ
လူငယ်တစ်ယောက်

ဆုပ်ထားတဲ့လက်သီးဟာ
မကျေနပ်တဲ့မျက်နှာကို ဖြောင်းခနဲထိုးပစ်ဖို့ပဲ
ယုယုယယနဲ့ ဘယ်တုန်းကမှ လမ်းဖြတ်မကူးဘူး
ကားဘီးနဲ့ကတ္တရာလမ်း ကျွီခနဲ ပွတ်တိုက်သွားတာ
အဲဒါ သူ့အံကြိတ်သံပဲ
လူငယ်တစ်ယောက်

အစပ်အဟပ်မတည့်တဲ့အစားအစာတွေ
ဖားတစ်ပိုင်း မြွေတစ်ပိုင်း လူတွေ
သိပ်နူးညံ့နေစရာ မလိုတော့လို့ပါ
ဆူးခက်တွေ စွင့်ကားပြီး ရန်လိုတယ်
ဖြတ်စီး(ဖျက်ဆီး)ခဲ့တဲ့နှစ်တွေ
မိန်းမပျက်တစ်ယောက်ရဲ့နှုတ်ခမ်းနီလောက်မှ တန်ဖိုးမရှိလို့ပါ
လက်ခုပ်မတီးလည်း သူ ရန်လိုနေတယ်
လူငယ်တစ်ယောက်

သူပြောတယ်
လက်အုပ်ချီပြီးမှ ကဗျာဖွဲ့ရမှာဆိုရင် ဆောရီးပါပဲတဲ့
ဆူးလေလမ်းမကြီးက နေ့လည်စာငတ်ပြတ်လို့
စေတီပုထိုးတွေဟာ ရွှေတွေနဲ့ဝဖြီးနေတာပဲ
အဲသလို ပြောရင် ငရဲကြီးမယ်တဲ့လား
ဒါပေမဲ့ သူပြောတယ်
လူငယ်တစ်ယောက်။

"လောကကြီးက ဘာလဲဗျာ" လို့ပြောတဲ့ကောင်တွေတွေ့ရင် သူလှောင်တယ်
ရန်ကုန်မြို့ရဲ့လမ်းကြိုလမ်းကြားက အမှိုက်စတွေလို
သောက်ပြီးသားရေသန့်ဗူးခွံလို
ခွေးစားသွားတဲ့လမ်းဘေးစားခွက်လို
ရောင်းမကုန်လို့ ပုပ်ကုန်တဲ့ဟင်းရွက်တွေလို
လူငယ်တစ်ယောက်
လက်သီးဆုပ်တယ်
ပြီးတော့...သူ
ခပ်ရိုင်းရိုင်းပြောရရင်
အသံကို ခြစ်ကုပ်ပြီး ခွေးလိုဟောင်ခဲ့တယ်
ရသမျှဟာ မတန်ဘူးထင်တယ်
လူငယ်တစ်ယောက်။

မနုရွချင်လို့ ဒီဝါကျတွေကို ရန်တွေ့သလိုဖွဲ့ထားတာ
တကယ်တော့
သူ မာကျောချင်ယောင်ဆောင်နေခဲ့တာ
ပါရီကို စာအုပ်ထဲကနေတွေ့တော့ သူငိုခဲ့ပါတယ်
နေ နေတာက ငါးပါးမှောက်နေတဲ့မြို့ကြီးမှာ
စစ်မဖြစ်ဘဲ ပြာကျနေပါပြီ
မကျေနပ်လို့ ထွီ ခနဲထွေးပြီး
လမ်းလျှောက်ရင်း လမ်းကိုဖနောင့်နဲ့ပေါက်ခဲ့ပါတယ်
လူငယ်တစ်ယောက်။ ။
 

                                                           မောင်ရေချမ်း

No comments:

Post a Comment

နှစ်သက်စွာ ခံစားနိုင်ပါစေ