Sunday, July 26, 2015

မိုးရာသီကုန်သွားတဲ့အခါ


မိုးရာသီကုန်သွားတဲ့အခါ
မိုးစက်တွေကို ငေးပြီး တစ်ခုခုကိုတွေးရတာလည်း ကုန်သွားမှာပါ
မိုးစက်တွေကို လက်ခုပ်ထဲထည့်ပြီး
တစ်ခုခုကို မျှော်ရတာလည်း ကုန်သွားမှာပါ
ဘာလိုပဲဖြစ်ဖြစ်
မိုးရာသီကုန်သွားရင်
ရွှံ့ဗွက်ထူတဲ့လမ်းတွေကို မဆဲတော့ဘူး
မုန်တိုင်းတွေအူတဲ့ကမ္ဘာအတွက်လည်း
အားမလို အားမရ မဖြစ်တော့ဘူး
တိတ်တိတ်လေးနေပြီး ကိုယ်လိမ္မာနေတော့မယ်


မိုးရာသီကုန်သွားတဲ့အခါ
တင်တု ရင်တုတွေရဲ့ထွန်းကားမှုလို
အနုပညာအတုတွေရဲ့ကြီးကျယ်မှုကို စိတ်ဝင်စားမှုမရှိအောင် ကိုယ်ကြိုးစားမယ်
ကဗျာတစ်ပုဒ်ရဲ့အာဟာရဓာတ်ဟာ
လူတိုင်းရဲ့အာသီသ မဟုတ်ဘူးဆိုတာ လက်ခံပါမယ်
အရက်ကို ခိုးခိုးသောက်လို့
လူမြင်အောင် ပုတီးလေးစိပ် သူတော်ကောင်းလေးလို အတင်းမပြောဘဲ
ကိုယ် လိမ္မာနေတော့မယ်

မိုးရာသီကုန်သွားတဲ့အခါ
ရူးနှမ်းနှမ်းအိပ်မက်တွေ မက်မနေတော့ပါဘူး
ရင်ခုန်တဲ့သူတွေကိုလည်း ယုံမနေတော့ပါဘူး
တစ်ခုခုများဖြစ်မလားဆိုပြီး တစ်ခုခုကိုလည်း
တမ်းတမနေတော့ဘဲ
ကိုယ့်ထမင်းကိုယ်စားမယ် အိပ်ရေးဝဝအိပ်မယ်
အဲသလို ကိုယ် လိမ္မာနေတော့မယ်

ယူကြုံးမရ မိုးရာသီ
လိမ်သမျှယုံတဲ့ ငအလေးလို မိုးရာသီ
ပျင်းရိလေးလံသောမိုးရာသီ
ဒီလို မိုးရာသီဟာ မကုန်နိုင်ဘူး တကယ်
တစ်နှစ်ပြီး တစ်နှစ် တစ်ရာသီပြီးတစ်ရာသီ
စုတ်တိစုတ်ချာ ချီတက်လာဆဲသာ
ကိုယ့်ရဲ့လိမ္မာခွင့် တားဆီးနေတော့တယ်
ဒီလိုနဲ့ ကိုယ် အရင်လိုပဲ ပြန်နေရပါတယ်
စိတ်ပါလက်ပါ ဝမ်းနည်းတယ်။ ။

                                          မောင်ရေချမ်း
                                         17/6/2015

No comments:

Post a Comment

နှစ်သက်စွာ ခံစားနိုင်ပါစေ