Monday, July 27, 2015

မျိုးဆက်တစ်ခုအတွက် ဝမ်းနည်းမှု


မျိုးဆက်တစ်ခုအတွက် ဝမ်းနည်းမှုဟာ
ရှေ့တည့်တည့်မှာ လာပျော်ရွှင်စွာနေပြတဲ့အခါစတယ်
မျိုးဆက်တစ်ခုအတွက် ဝမ်းနည်းမှုဟာ
နေ နေတဲ့ခေတ်ကို ဆဲဖို့ ငိုင်နေတာတွေ့လို့ ရတယ်

ဟေ့...ရှေ့မျိုးဆက်
ပုခုံးပုတ်ပြီးလှမ်းခေါ်တာ ရိုင်းတယ်ထင်ချင်ထင်
ပညာမျိုးဆက်ဆီက အရိုးအကြွင်းလေးများရရုံတင်
ငါ အရိုင်းအစိုင်းဖြစ်ရတာ တန်ပြီ
ပညာသင်တာ အသပြာများများရှာနိုင်ဖို့ပါ တဲ့
သိပ်ဝမ်းနည်းကောင်းတဲ့မျိုးဆက်ဟာ
အဲဒီလို တွေးခေါ်ပြီး ပညာတွေသင်ခဲ့ကြရှာတယ်
ဘယ်လောက် ယူကြုံးမရဖွယ်လဲ


ရှင်သန်ခြင်းကို လွတ်လပ်ဖို့
သုံးစားမရတဲ့စနစ်ကို သွန်ဖို့ကို မေ့နေကြတဲ့မျိုးဆက်
ကလပ်လေးတက်ပြီး ခုန်နေရုံတင်
အပျော်တွေ အစုံအလင်ပြုတ်ကျလာပြီထင်တဲ့ မျိုးဆက်
ဘီယာဆိုင်လေးထိုင်နေရုံမှာ
အရာရာပြည့်စုံနေပါပြီ ထင်တဲ့ မျိုးဆက်
ငရဲပြည်ကို နတ်ပြည်ထင်နေရှာတဲ့ မျိုးဆက်
ဟေ့...ပိုးစိုးပက်စက် မျိုးဆက်
ဒီမျိုးဆက်မှာ အနာဂတ်ဟာ မြေမြှုပ်ခံရပြီ
ရိုင်းတယ်
ရနိုင်သလောက် ကိုယ့်အခွင့်အရေးကိုယ်မရတဲ့ကောင်တွေ
ငြိမ်ခံနေတာကိုပဲ ရိုးသားပါတယ်ဆိုပြီး ဂုဏ်ယူနေကြတဲ့ မျိုးဆက်
လောက်တက်နေတဲ့ ငိုးမမျိုးဆက်

ဝမ်းနည်းတဲ့အခါ စိတ်ရှိလက်ရှိဆဲပြီးတိုင်း
မျက်ရည်ကို ဘယ်သူမြုံထားနိုင်ပါသလဲ
မြုံထားသမျှဟာ ချွန်မြနေတဲ့ဒဏ်ရာသာဖြစ်ခဲ့တယ်
ဒီမျိုးဆက်ထဲမှာ လူငယ်လို ငါဟာ မပျော်ရွှင်
အမြဲအော်နေမိတဲ့ငါ့အသံဟာ အိပ်မက်ပဲ
ဈေးထဲမှာ
အကျဉ်းထောင်ထဲမှာ
ဘတ်စ်ကားမှတ်တိုင်မှာ
တက္ကသိုလ်တွေထဲမှာ
နိုင်ငံတော်အလံအောက်မှာ
ဖာတန်းမှာ
ဟောဒီမျိုးဆက်ဟာ သော့ပျောက်ခဲ့ပါပြီ

မျိုးဆက်တစ်ခုအတွက် ဝမ်းနည်းမှုဟာ
ငါကိုယ်တိုင် ဒီမျိုးဆက်ထဲမှာ
မျက်ရည်ကျရတဲ့လူငယ်တစ်ယောက်ဖြစ်တဲ့အခါ
စီးချင်သလိုစီးတဲ့မြစ်ထဲ မျောသွားတယ်။ ။

                                            မောင်ရေချမ်း
                                          25 July 2015

No comments:

Post a Comment

နှစ်သက်စွာ ခံစားနိုင်ပါစေ