Monday, August 17, 2015

ငူငိုင်မနေဘဲ ငေါက်ခနဲထထိုင်ဖို့ ဒီလူနာကို နှိုးပေးကြပါ


နာတာရှည်ရောဂါနဲ့အိပ်ယာထဲ လဲနေတဲ့လူနာကိုပဲ
တစ်ခါလည်းမဟုတ် နှစ်ခါလည်းမဟုတ်
ဘေးဒုက္ခတွေဟာ ဘင်တွေဗုံတွေတီးပြီး ဝင်လာတာ

ဗျိုင်းတွေလိုပျံဖို့ကြိုးစားနေဆဲလူနာပါ
ဗွက်တောထဲလဲနေတဲ့ ဖိနပ်မပါခြေထောက်များပါ
ဆင်းရဲလွန်းလို့ကလီစာတွေ ရောင်းစားခဲ့မိသူပါ

လူနာဝတ်ထားတဲ့ ချို့တဲ့စုတ်ပြဲအင်္ကျီမှာ
လွတ်လပ်ရေးနဲ့ငြိမ်းချမ်းရေးဆိုတဲ့စာတန်းပါတယ်
ဒါပေမဲ့ ချေး(ကြေး)အထပ်ထပ် ဖုန်အထပ်ထပ်ကပ်လို့
ဖတ်ဖို့ မြင်ဖို့ ခက်လွန်းနေပြီ



လူနာဟာ တစ်ခါက အလွန်ချမ်းသာ
လူနာဟာ တစ်ခါက ငေးကြည့်ရတဲ့ပညာတတ်

ကိုယ်ခံစွမ်းအားသန်မာခဲ့သူ လူနာဟာ
အနူ အဝဲ ဝေဒနာတွေ အတင်းထိုးသွင်းခံခဲ့ရသလား

သနားစရာဖြစ်နေခဲ့ရင်တောင်
အသနားခံဖို့ဝန်လေးတဲ့ မြင့်မားတဲ့မာနနဲ့ လူနာပါ
လူနာဟာ ကိုယ်ထူပြီး ကိုယ်ထမယ်ဆိုတဲ့စိတ်ထားနဲ့
အဲဒီလို တောက်ကြွားခမ်းနားခဲ့တာ တစ်ချိန်ကနှစ်များ

အခုတော့ လူနာဟာ ဖြူကာပြာကာကျခဲ့လေပြီ
လူနာကို လူတကာသနားကြလေပြီ
အိုးးးး အခုတော့ လူနာဟာ အမောဖောက်လေပြီ

မြူတစ်မှုန်စာလောက်မျှ ကျန်တော့တာဆိုရင်တောင်
ရုန်းကန်ရမယ့်တက်ကြွသောအကောင်းစားအားမာန်
သြော်...တအီအီ ဝမ်းနည်းနာကျင်ခဲ့ရပါတယ်
ဆေးရုံထဲကနေ
ငိုကြွေးသံပြန့်ကားနေတဲ့ ဒီလူနာဟာ ဖျော့ဖျော့ဖြူလို့

ငါတို့ရဲ့ခန္ဓာကိုယ်ထဲက သွေးတွေတဒုန်းဒုန်းခုန်နေတယ်

ငါတို့ဟာ
အဲဒီလူနာထဲမှာ သေးငယ်တဲ့အသက်ဓာတ်ဖြစ်ခဲ့
ငါတို့ရဲ့ဖြစ်ခြင်းဟာ နာမကျန်းမှုကိုတိုက်ဖျက်ဖို့ပါတဲ့

ဆေးရုံဟာ ငါတို့ကမ္ဘာကြီးဖြစ်ခဲ့ရင်
အသက်လုကာ ကျားကန်ရုန်းကန်နေသောဒါ လူနာပါ
ထိုလူနာဟာ ငါတို့ချစ်သောငါတို့နိုင်ငံဖြစ်ခဲ့တာ

လူနာနိုင်ငံတော်အတွက်ပါပဲ
လူနာနိုင်ငံတော်အတွက်ပါပဲ

ဟေ့
နိုင်ငံတော်သီချင်းကို စိတ်ပါကိုယ်ပါ ဆိုကြမယ်
ငိုတဲ့အခါလည်း ရဲရင့်စွာငိုပြမယ်
အသက်ပြင်းသောလူနာအဖြစ်
ဆေးရုံပေါ်က ပြန်ဆင်းမယ်
ဒါ မာထန်တက်ကြွတဲ့အားမာန်သီချင်း
ငါတို့ဆိုခဲ့ခြင်း ဖြစ်တယ်
သီချင်းဆိုပြီး ဒီလူနာကို ငါတို့ဟာ နှိုးကိုနှိုးရမယ်

                                     မောင်ရေချမ်း
                                  9 August 2015

No comments:

Post a Comment

နှစ်သက်စွာ ခံစားနိုင်ပါစေ