Sunday, October 16, 2016

ပြန်ဆုံတဲ့နေ့



ပြန်မဆုံခဲ့တဲ့နေ့တွေအကြောင်း သတိရလို့
ပြန်ဆုံတဲ့နေ့ဆီ လာခဲ့မိတယ်

လက်ဗလာနဲ့ခြေအိတ်စွပ်မိတဲ့ဖိနပ်
အဲဒီ့ဖိနပ်အတွက်လည်း လမ်းတစ်ခုရှိလိမ့်မယ်
အနာဂတ်ကို ဒီလိုပေါ့ပါးနေချိန်မှာ
ပြန်ဆုံတဲ့နေ့ရဲ့လေးလံသံယောဇဉ်နေရောင်အကြောင်းက
နှုတ်ဆက်ဖိနပ်နဲ့ ခရီးဝေးလေယာဉ်ပျံနဲ့

ပြန်မဆုံခဲ့တဲ့နေ့တွေမှာ မနေချင်လို့
ပြန်ဆုံတဲ့နေ့တွေ ပြက္ခဒိန်လုပ်ကြည့်မိတဲ့အခါ
ဖုန်းမဆက်နိုင်တဲ့ ဝေးကွာခြင်းအတွက်
အချစ်ဟာ တခြားတွေရောနှောနေတဲ့ဒြပ်ပေါင်း

အချစ်ကျဆုံးရင် အလွမ်းအလိုလိုအနိုင်ရတယ်
လူမမြင်အောင်ဒဏ်ရာတွေနဲ့ မုန်းကြဖို့ဆိုရင်
ပြန်ဆုံတဲ့နေ့တွေ ရှေးကတည်းက မလိုအပ်ခဲ့ရုံပေါ့

ဒီနေ့ဟာ ပြန်ဆုံတဲ့နေ့မဟုတ်သေးတဲ့အခါ
အညံ့စားကဗျာဆရာအဖြစ်
အပေါစားဝါကျတွေ ရေးခြစ်ခဲ့ပါတယ်
မင်း ပြောသလို အလကားအားနေချိန်မှာ
အပျင်းပြေ အလွမ်းဖြေ။ ။

မောင်ရေချမ်း
၁၇ အောက်တိုဘာ ၂၀၁၅

No comments:

Post a Comment

နှစ်သက်စွာ ခံစားနိုင်ပါစေ