မင်းလည်း ဘယ်ကိုမှ မပျံသန်းနိုင်
ကိုယ်လည်း ဘယ်ကိုမှ မပျံသန်းနိုင်
မပျံသန်းနိုင်တဲ့ ကိုယ်တို့ အချင်းချင်းလည်း
(ဘယ်တော့မှ မဟုတ်ပေမယ့် )
အခုတော့ ဘယ်လိုမှ တွေ့ဆုံဖို့ မဖြစ်နိုင်
မင်းရဲ့လှောင်အိမ်ကို ကိုယ်ငေးကြည့်တယ်
ကိုယ့်ရဲ့လှောင်အိမ်ကို မင်းငေးကြည့်တယ်
ကိုယ်တို့ကြားမှာ သံတိုင်တွေ ခြားနေတယ်
သံတိုင်တွေကြားထဲမှာတော့ ...
လွတ်လပ်သော လေများ မုန်တိုင်းပမာ တိုက်ခတ်လို့
ပျော်ရွှင်စရာဆိုတာ ...
ဘယ်လှောင်အိမ်ထဲမှာ ရှိခဲ့ဖူးလို့လဲကွယ် ။ ။
-မောင်ရေချမ်း
ရွှေတိဂုံစေတီတော် ၊ စနေထောင့်မှ
အလိမ်အညာ အမှတ်တရတွေအတွက်
ဂိုသေ့ရဲ့ဖော့စ်ကို ငါ စားတယ်
ရိုင်းပျရန်လိုမှု မဖြစ်စေဘဲ
အထီးကျန်ဆန်ခြင်းဟာ အလေ့အကျင့်ဖြစ်လာလို့
ထင်ရာစိုင်းခွင့်ကို ငါ စားတယ်
ပဋိပက္ခကို အသွင်ပြောင်းဖို့
အောက်မှ အထက်သို့ ချဉ်းကပ်နည်းနဲ့
တစ်ယူသန် တတိယကမ္ဘာကို ငါ စားတယ်
ပြဿနာသစ်ပင်ကို နစ်နာချက်အရ
တပြေးညီ မုန်းတီးစွာ ငါ စားတယ်
ချွန်မြစူးရှတဲ့ ဘိုင်စကယ်စမုတ်တံတွေကို ကျော်လွန်ပြီး
ရစ်ချပ်ဒေါကင်းရဲ့တစ်ကိုယ်ကောင်းဆန်သောမျိုးစေ့ကြောင့်
ဆက်သွယ်ရေး ကျွမ်းကျင်မှုမှာ
ဘုံတူညီချက် ရပ်တည်ရေးမှာ
လှုပ်ရှားပြောင်းလဲရေးသမားကို ငါ စားတယ်
ထိရောက်တဲ့နားထောင်ခြင်းလည်း မရှိ
တက်ကြွတဲ့ အကြမ်းဖက်ခြင်းလည်း မရှိ
ရောမမြို့ရဲ့ရေပြင်ပေါ်မှာတော့
ငါ မရေးထားတဲ့ ကိရဲ့စာကြောင်းတချို့ ရှိတယ်
အဲဒါကြောင့်…
လူ့တန်ဖိုးကို ယုံမှားသံသယဖြစ်လို့
အနားသတ်ဘောင်ခတ်ထားသော
ရှေးရိုးစွဲဒီမိုကရေစီကိုပါ ငါ စားတယ် ။ ။
မောင်ရေချမ်း
အာသီသမဂ္ဂဇင်း | အမှတ် ၂ အတွဲ ၁ |
စက်တင်ဘာ ၂၀၁၉
" ရှင် ဘယ်မှာလဲ "
" ဘီဟာပီတော့ကြယ်စုထဲမှာ"
နေထွက်ပြီးစ အချိန် ၊ မိုကီးတွိုင်းဆွာမြို့ တစ်နေရာ။ အာသာက ဘောင်းဘီဇစ်ကို ဆွဲတပ်နေခိုက် ဟယ်လင်က ခေါင်းဖြီးနေရင်း
ရွှင်မြူးတဲ့လေသံနဲ့ လှမ်းအော်တယ်။
"ဝက်ပေါင်ခြောက်တွေရဲ့အနာဂတ်ကတော့ မြောင်းထဲမှာ။
ရှင့်အနေနဲ့ တမာချဉ်ကို စိတ်ဝင်စားမှ ဖြစ်တော့မယ်"
အိပ်ချင်မူးတူး အာသာက မဆိုင်းမတွပဲ ပြန်ပြောတယ်။
"ကိုယ်က ဘာပဲဖြစ်ဖြစ် ရပါတယ်။ မင်းသာ ကြက်ဥတွေသုံးပြီး
ခေါင်းလျှော်တဲ့ အကျင့်ကို မြန်မြန်ပြင်စမ်းပါ"
အဲဒီစကားက ဟယ်လင့်ဒေါသကို ဆွလိုက်ပုံပါပဲ။ ဟယ်လင်ဟာ
မှန်တင်ခုံပေါ်က နှုတ်ခမ်းနီတောင့်နဲ့ အာသာ့ကျောကို ပေါက်လိုက်တယ်။
" ရှင်ဟာ တကယ်တော့ တစ်နာရီမှာ အကြိမ်တစ်ရာ့နှစ်ဆယ်လောက် ရိုက်သတ်ပစ်သင့်တဲ့ တစ္ဆေပဲ။ မနက်ဖြန်မနက်ကျရင်တော့ ဒီနေ့လို မုန့်ဟင်းခါးကို စားရလိမ့်မယ်လို့ ရှင် ဘယ်တော့မှ မမျှော်လင့်နဲ့ "
ပြောမယ့်သာ ပြောရတာပါ။ ဟယ်လင်ဟာ သူကိုယ်တိုင် ဒီနေ့ ဘာနေ့ ဆိုတာကို မသိဘူး။ အာသာလည်း သိမယ် မထင်ဘူး။
ဘာပဲဖြစ်ဖြစ်...သူတို့အိမ်ရှေ့မှာ မြင်းလှည်းတစ်စီးက ရောက်နေပြီ။ ။
မောင်ရေချမ်း
30 June 2017
