Sunday, July 26, 2015
အကာအကွယ်ပေးနိုင်ပါတယ်ဆိုတဲ့ တရားဥပဒေဟာ သုံးပြီးသားကွန်ဒုံးကြီးလို မလုံခြုံရင် အသက်အန္တရာယ်ရှိကြောင်း ခေါင်းလောင်းတီးခြင်း
လမ်းထဲမှာ သူခိုးသောင်းကျန်းချက်ကတော့ ပိုးစိုးပက်စက်ပဲ။
ဟိုတလောကတင် ညဘက် ရပ်ထားတဲ့ကားက ဘတ်ထရီအိုးဖြုတ်သွားတယ်။
ပြီးခဲ့တဲ့နေ့ကတော့ ကိုယ့်အိမ်ရှေ့မှာ ရပ်ထားတဲ့ဆိုင်ကယ် အိမ်ထဲမှာလူတွေရှိနေတဲ့ကြား ဘယ်လိုမ သွားလဲကို မသိဘူး အံ့ရော။ သူခိုးကို အပြစ်မတင်ရက်ပါဘူး။ ခွေးတွေလောက်တောင် ဟောင်ဖော်မရတဲ့ တရားဥပဒေစိုးမိုးရေးဆိုတာကြီးကိုပဲ ခဲနဲ့ထုချင်လာတယ်။ ဆိုင်ကယ်အလုခံရတုန်းကလည်း တရားခံမပေါ်။ ဒီနိုင်ငံက တရားဥပဒေဆိုတာဟာ ရာဇဝတ်မှုမကျူးလွန်တဲ့လူကောင်းတွေကိုဖမ်းတဲ့နေရာမှာပဲ အလွန်တော်တယ်။
-------- -----------
အဲဒါနဲ့ပတ်သတ်ပြီး
ကိုယ့်ထမင်းကိုယ်စားပြီး ဥပဒေအောက်မှာ နေပါတယ်ဆိုတဲ့လူတွေကို သတိထားဖို့နှိုးဆော်ချင်လာလို့ ဒီအရေးအသား အားနေတာနဲ့ရေးဖြစ်ပါတယ်။ ငြိမ်းချမ်းစွာ အေးအေးလူလူ ကိုယ့်အလုပ်ကိုယ်သွား ကိုယ့်အိမ်ကိုယ်နေတုန်းမှာပဲ ရာဇဝတ်မှုကျူးလွန်ချင်တဲ့လူက ပစ္စည်းယူ လူသတ်သွားတာများခံခဲ့ရင်( မကြုံလာပါဘူးလို့ပေါ့ပေါ့ဆဆ တွေးချင်တွေးပေါ့ ဒါပေမဲ့ အကာအကွယ်ပေးနိုင်တဲ့လုံခြုံတဲ့ဥပဒေတရားမျှတမှုမရှိတဲ့နိုင်ငံမှာ ယုတ်မာမှုတွေဟာ ကိုယ်နဲ့မဆိုင်လည်း ကိုယ့်ဆီလာနိုင်တယ် ဆိုတာ မေ့နေရင် သနားစရာပါပဲ) အဲဒီလို ကျူးလွန်သတ်ဖြတ်ခံခဲ့ရလို့ တရားခံများ ဥပဒေအရအရေးယူခံရပြီးလား ဆိုတဲ့ စပ်စုချင်တဲ့စိတ်နဲ့ တမလွန်ဘဝကနေတောင် ယောင်လို့လှမ်းမကြည့်နဲ့။ ဒီနိုင်ငံမှာ အကြမ်းဖက်လူသတ်သွားပြီး တရားခံမပေါ်တဲ့အမှုတွေအများကြီး။ ပြောချင်တာက ဘယ်လိုဖြစ်ဖြစ် ကံကောင်းထောက်မလို့ လူ့ဘဝသက်တမ်းတစ်လျှောက်မှာ ခင်ဗျားဟာ ငြိမ်းချမ်းအေးဆေးစွာနေခဲ့ရရင်တောင် ခင်ဗျားနောက်ကလာမယ့် ခင်ဗျားမျိုးဆက်တွေဟာ အဲဒီအကာအကွယ်မဲ့တဲ့ မတရားတဲ့ ဒီနိုင်ငံရဲ့ ဥပဒေအောက်မှာ မလုံခြုံတဲ့လူတွေအဖြစ် သိမ်ငယ်စွာ လူလာဖြစ်ကြပါဦးမယ်။ ထပ်ပြောချင်တာက ကိုယ့်ထမင်းကိုယ်စား ကိုယ်နဲ့မဆိုင် ဘေးထွက်နေ ဆိုတဲ့ အထဲမှာ ဒီအရေးအသားတွေကိုဖတ်နေတဲ့ ခင်ဗျားဟာ တစ်ယောက်အဖြစ်ပါဝင်နေမယ်ဆိုရင် မတရားတဲ့ဥပဒေအောက်မှာ ငြိမ်းချမ်းစွာနေထိုင်နေနိုင်တဲ့လူလို့ ဂုဏ်ယူနိုင်ပါပြီ။ အဲဒီ မတရားတဲ့ဥပဒေကတော့ လူကောင်းတွေကို ဖမ်းဆီးပြီး ရာဇဝတ်သားတွေကို မဖမ်းနိုင်တဲ့ လူတွေနေတဲ့ကမ္ဘာပေါ်မှာ လူမဆန်တဲ့ဥပဒေအဖြစ်ဂုဏ်ယူနေပါပြီ။
------- ---------
လူဆန်တဲ့လူပေါင်းများစွာဟာ လူဆန်တဲ့တရားမျှတမှုကို လိုအပ်လို့တောင်းဆိုနေကြပါတယ်။ ဒါပေမဲ့ အဲဒီ့အရေအတွက်ဟာ နည်းပါးလွန်းပါတယ်။ ကမ္ဘာပေါ်မှာ အထူးသဖြင့် ဒီနိုင်ငံမှာ ကိုယ့်ထမင်းကိုယ်စားတယ်ဆိုတဲ့နေထိုင်မှုနဲ့ ကိုယ့်ကိုတိုက်ရိုက် လာမထိခိုက်သေးတဲ့ကိစ္စတွေအပေါ် အလေးအနက်ထားပါဝင်ပတ်သတ်ဖို့ မေ့နေတဲ့လူတွေသာ အများကြီးပါပဲ။ ကမ္ဘာကြီး သစ်တောပြုန်းတီးတာ ငါနဲ့ဘာဆိုင်သလဲ တွေးနိုင်ပါတယ် ရပါတယ်။ ခင်ဗျားနေထိုင်အိပ်စား ပိုက်ဆံရှာ အလုပ်လုပ် ကလေးမွေး မစင်စွန့် နောက်ဆုံးမသာအလောင်းဖြစ်ရတာလည်း ဒီကမ္ဘာပေါ်မှာပါပဲ။အဲဒီလို ကျေးဇူးရှိတဲ့ ကမ္ဘာကြီးကိုမှ ပစ်စလက်ခတ်သဘောထားတာ သားရေပေါ် အိပ်သားရေနားစာ အရိပ်နေနေ အခက်ချိုးချိုး တိရစ္ဆာန်မျိုးလို့ပဲ နောင်လာမယ့်ယဉ်ကျေးတဲ့အနာဂတ်လူသားတွေက သတ်မှတ်ကောင်းသတ်မှတ်ပါလိမ့်မယ်။
--------- ----------
ကမ္ဘာကြီးအကြောင်းတွေးရတာ သိပ်လေးလံရင် ခင်ဗျားနေတဲ့နိုင်ငံငယ်လေးအကြောင်းပဲတွေးကြည့်ပေါ့။ ခင်ဗျားဟာ သိပ်ကောင်းမွန်မျှတတဲ့ လူသားပီပီသသ လွတ်လပ်ခွင့်ရှိတဲ့ ခင်ဗျားရဲ့ကျွမ်းကျင်တတ်မြောက်ရာ အရည်အချင်းအရ ထိုက်တန်စွာ တန်ဖိုးသတ်မှတ်ခံရတဲ့ စသောအဲသလို ဂုဏ်ဒြပ်များနဲ့ လူဖြစ်ခွင့်ရတဲ့နိုင်ငံမှာနေထိုင်နေပါသလား။ အဖြေကိုရှာလို့ခေါင်းခါမိရင်တော့ နောင်တစ်ချိန်မှာ ဂုဏ်ယူစွာခေါင်းညိတ်ခွင့်ရဖို့ ကိုယ့်ထမင်းကိုယ်စားပြီးနေတာ ကိုယ်နဲ့မဆိုင်ဘူး ဆိုတဲ့နေထိုင်မှုကို စွန့်လွှတ်ဖို့ အရေးတကြီးလိုတာပါပဲ။ ကိုယ်မလုပ်နိုင်တဲ့ကိစ္စတွေကိုတောင် အနည်းဆုံးစိတ်ဝင်စားရပါလိမ့်မယ်။ ပြီးတော့ အသိဥာဏ်ရှိတဲ့လူတစ်ဦးအနေနဲ့လူတိုင်းဟာ ဘယ်ဟာတရား ဘယ်ဟာ အမှားဆိုတာ တွေးကြည့်ထင်မိနိုင်ပါတယ်။ ပြီးရင် အဲဒီ့အပေါ်မှာ ကိုယ့်ရဲ့ထောက်ခံခြင်း ရှုံ့ချခြင်းကို ရသလောက် တတ်နိုင်သလောက် လုပ်ကြရပါမယ်။ လုပ်ခြင်းမလုပ်ခြင်းကတော့ ဒီအရေးအသားကို ဖတ်နေတဲ့ခင်ဗျားရဲ့ လွတ်လပ်ခွင့်ပါပဲ။ ဘယ်သူ့ရဲ့ကောင်းချီးပေးမှု ဘယ်သူ့ရဲ့ဆဲဆိုသြဘာပေးမှုကိုမှ မမျှော်လင့်ဘဲ ရေးချင်တာရေးပြီး နှိုးဆော်ခွင့်ဟာလည်း ကျနော့်လွတ်လပ်ပါပဲ။
-------- --------
ဘာပဲဖြစ်ဖြစ် သေချာတာကတော့ ကိုယ့်ထမင်းကိုယ်စားတဲ့လူစားမျိုးတွေ များနေပြီး မတရားတဲ့ဥပဒေအောက်မှာ ပြားပြားမှောက်နေရှာတဲ့လူတွေ များများလာရင်တော့ ရှေ့ဆက်လာမယ့်အနာဂတ်မှာလည်း မတရားမှု ယုတ်မာမှုတွေဟာ ခင်ဗျားရဲ့လည်ပင်းကို လာမလှီးရင်တောင် ကြားရတဲ့သတင်းတွေက တဆင့် ခင်ဗျားနားကို ခင်ဗျားမျက်စိကို မတရားမှုတွေလွှမ်းမိုးသွားဦးပါပဲ။ နောက်လာမယ့် မျိုးဆက်ဟာလည်း မတရားမှုအောက်က ငကြောက်ကလေးတွေအဖြစ် ကိုယ့်ထမင်းကိုယ်စားပြီး နေထိုင်သွားကြပါလိမ့်မယ်။အဲဒီတော့ ခင်ဗျားကြိုက်နှစ်သက်ရာ ဟင်းနဲ့ ကိုယ့်ထမင်းကိုယ် စားနိုင်ပါပြီ ခင်ဗျာ။ လွတ်လပ်မျှတမှုဟင်းကိုတော့ တောင်းဆိုမှာယူစားသုံးချင်စိတ်ရှိရင်တောင် ရချင်မှရတတ်ပါတယ်။
မောင်ရေချမ်း
24/6/2015
Subscribe to:
Post Comments (Atom)
No comments:
Post a Comment
နှစ်သက်စွာ ခံစားနိုင်ပါစေ