အစကတည်းက ရေမွန်းနေတဲ့နိုင်ငံကိုမှ
အရင်ကတည်းက ရေနစ်နေတဲ့အနာဂတ်ကိုမှ
အဲဒီရေတွေဟာ ရေမဆန်စွာရောက်လာတာပဲ
ဆဲစရာဟာ စုံနေတဲ့အခါ
ဘယ်ဟာကို စဆဲရမလဲ ဝေဝါးလို့
မိမိကိုယ်မိမိပြန်ဆဲပြီး ယူကြုံးမရဖြစ်ခြင်းကစမယ်
ရေလွှမ်းသွားသော ရုတ်ရုတ်သဲသဲနေ့များ
ရသလောက်အရိုင်းမခံဘဲရုန်းကန်ကြမယ်
ရေကို ယဉ်ကျေးစွာတုံ့ပြန်မယ်
ငါတို့ဟာ လူဖြစ်ကြပါတယ်
ငါတို့ဟာ လူဖြစ်ကြပါတယ်
လူမဖြစ်သူတွေကို မေ့ပြီး လူဖြစ်ကြပါမယ်
ရိုင်းစိုင်းသူတွေကို ရွံပြီး ရင်နာကြပါမယ်
ဒါပေမဲ့ ရပါတယ် ရပါတယ်
လူဆန်ဖို့အဖြစ်ပါပဲ
ငါတို့အိတ်ကပ်ထဲက ရှိစုမဲ့စုက စဆိုလည်း စမယ်
ဒါ ရေငတ်နေတဲ့လူတွေကိုမှ ရေကြီးသွားတာ
မုဆိုးမနိုင်ငံကိုမှ မိုးလိုက်ရွာသွားတာ
ဘူးလေးရာပြဿနာကိုမှ ထပ်ပြီးဖရုံတွေဆင့်သွားတာ
မြေနိမ့်ရာကိုမှ လှံတွေအများကြီး ထပ်စိုက်ရသလား
နတ်ကောင်းနတ်မြတ်အပေါင်းတို့ရယ်
ငိုဖို့မျက်ရည်ဟာ ဝမ်းနည်းစွာငိုင်နေခဲ့ပါတယ်
ခေတ်မကောင်းတဲ့ကြား ထပ်သောင်းကျန်းသွားတဲ့ ရေတွေ
ဝမ်းနည်းမှုဟာ လူကိုရူးစေတာပဲ
လူတွေဟာ လူပီသဖို့ အရူးအဖြစ်ကို ခံယူကြမယ်
ကိုယ်ချင်းစာမှုကို အခုချက်ချင်းပဲ စမယ်
ကိုယ့်ရဲ့ကိုယ်ကျိုးကို နည်းနည်းဖြစ်ဖြစ်ဖဲ့လို့
ရွဲ့စောင်းကုန်တဲ့ဒုက္ခတွေကို စာနာကြမယ်
ကျွဲ နွား လယ်ယာတွေကို ပြန်ရပါ့မလား
မနေ့က ဆာလောင်ထမင်းလုတ်အတွက်
ဒီနေ့စားရလို့ အာဟာရပြန်ပြည့်ပါ့မလား
မရပေမယ့် ရတဲ့နေရာက စကြမယ်
မဖြစ်ပေမယ့် ဖြစ်တဲ့နေရာက ဒုက္ခကို ဖြိုကြမယ်
ဝင်းပနေရောင်ခြည်လို
သိမ်မွေ့ဖြူစင်သီချင်းတစ်စလို
ကျေးဇူးရှိရာစကြဝဠာလို ငေးမျှော်ရင်း
သာဓုများစွာခေါ်ရင်း ရိုသေကြည်ညိုစွာ
လူပီသသူအပေါင်းအား ဦးချလိုက်ပါတယ်
သဘာဝဘေးကို ယဉ်ကျေးစွာရုန်းကန်ဖို့
လမ်းတွေကို ရသလောက် ပြန်ဆယ်ယူဖို့
လူတွေဟာ ကမ္ဘာကြီးထဲ ရှိခဲ့ကြပါတယ်
ဒီလိုလူတွေကို ယုံကြည်မှုနဲ့သာပဲ
ဝမ်းနည်းမျှော်လင့်သော ဒီစာသားတွေစတယ်
ဝမ်းနည်းမျှော်လင့်သော ဒီစာသားတွေဆုံးမယ်။
ပွင့်တော်မူပြီးကြကုန်သော မြတ်စွာဘုရားများ
ဒီဘဝ ဒီကဗျာ ဒီတစ်ခါသာ ရေးပါရစေသား။
ဝမ်းနည်းဖွယ်မိုးရေများ ကြေကွဲစွာ။ ။
မောင်ရေချမ်း
2 August 2015
No comments:
Post a Comment
နှစ်သက်စွာ ခံစားနိုင်ပါစေ